उत्पादनमूलक बहुउद्देश्यीय कार्य गर्दै ललितपुर बहुउद्देश्यीय सहकारी संस्था लि., लगनखेल
ललितपुरको लगनखेलमा रहेको ललितपुर बहुउद्देश्यीय सहकारी संस्था लि.ले दर्ता हुँदाको मुख्य उद्देश्य अनुरुप बचत तथा ऋण कारोवार सँगै उत्पादनमूलक कार्य गरिरहेको , यसैक्रममा यसले ललितपुरको गोदाबारी नगरपालिका-८, फर्सीटोलमा कृषि तथा पशुपालन गरिरहेको र यसको अवस्था सन्तोषजनक रहेको सो संस्थाका कार्यकारी प्रमुख शिवगोपाल थापाले बताउनु भएको छ । सहकारी सञ्जालसँग कुरा गर्दै उहाँले सहकारी ऐन , २०७४ मा व्यवस्था भएएको प्रावधान अनुरुप बहुउद्देश्यीय सहकारी संस्थाहरुले ३० प्रतिशत बचत तथा ऋणमा र ७० प्रतिशत अन्य कार्यमा लगाउनु पर्दछ भन्ने विषय अस्पष्ट छ र त्यो विषय बहुउद्देश्यीय सहकारी संघ/संस्थाको हितमा नभएकोले त्यसलाई स्पष्ट पारी बहुउद्देश्यीय सहकारी संघ/संस्थाको विकास र प्रवर्द्धन हुने गरी सहकारी ऐन/ नियमावली संशोधन हुनु पर्दछ भन्नुभयो ।
२०७६ पुस १९ गते आफ्नो २२औं वार्षिक साधारणसभा सम्पन्न गरेको उक्त संस्थामा २०७६ फाल्गुण मसान्तसम्म बचत (निक्षेप) संकलन रु.४ करोड ८६ लाख ६ हजार ६ सय ३/५९ , शेयर पूँजी रु.९३ लाख ८४ हजार ५३ र कर्जा तथा सापटीथ रु.४ करोड ४८ लाख १० हजार ९ सय ४६ रहेको सोही संस्थाका सचिव शान्त गोविन्द महर्जनको भनाई छ । त्यो संस्था आफ्ना शेयर सदस्यहरुको जीवनस्तर माथि उठाउन सहयोग पुग्ने गरी गतिविधिहरु सञ्चालन गर्दै निरन्तर प्रगतिपथमा अगाडि बढिरहेको उसका आर्थिक सूचाङ्कबाट देखिएको छ । यतिबेला सो संस्थाको सञ्चालक समितिको अध्यक्षमा जितमल महर्जन ,उपाध्यक्षमा माणिकलाल शाक्य , कोषाध्यक्षमा शिवगोपाल थापा र सचिवमा शान्त गोविन्द महर्जन तथा सदस्यमा जीत गोविन्द महर्जन , बेखामुनि महर्जन , जगत वीर महर्जन र उर्मिला के.सी. एवंम लेखा सुपरीवेक्षण समितिको संयोजकमा रामभक्त डंगोल तथा सदस्यमा सुरज महर्जन र प्रेमलाल महर्जन कार्यरत हुनुहुन्छ । आर्थिक वर्ष २०७५/०७६ मा सोही संस्थामा शेयर सदस्य संख्या ६४० , शेयर पूँजी रु.८९ लाख ५२ हजार ३ सय ४ , बचत (निक्षेप) संकलन रु.४ करोड ६४ लाख ३९ हजार ७ सय ४५/५९ ,कर्जा तथा सापटी रु.४ करोड ३८ लाख १ हजार ७ सय ४१ र कूल पूँजी तथा दायित्व रु.५ करोड ६४ लाख ५१ हजार ४ सय ८२/६७ रहेको बताइएको छ ।
