नयाँपाटी साकोस , नयाँपाटीको आयोजनामा आज आकस्मिक घुम्ती रक्तदान कार्यक्रम सम्पन्न
विश्वव्यापी रुपमा माहामारीको रुपमा फैलिरहेको कोरोना भाइरस(COVID-19) को संक्रमण फैलिन नदिन नेपाल सरकारले देशभर गरिरहेको लकडाउनका कारण रगतको अभाव भइरहेको बेला लकडाउन कै वीच गोकर्णेश्वर नगरपालिका-२, नयाँपाटीमा आफ्नै भवनमा मुख्य कार्यालय तथा सोही नगरपालिका-६, जोरपाटी र कागेश्वरी मनोहरा नगरपालिका-१, गागलफेदीमा सदस्य सेवाकेन्द्र सञ्चालन गरिरहेको नयाँपाटी बचत तथा ऋण सहकारी संस्था लि. को आयोजना र ब्लड डोनर एसोसियसन नेपाल(ब्लोदान) आह्वानमा आज गोकर्णेश्वर नगरपालिका वडा नं.१,को सुन्दरीजल बसपार्क , बाराही चोक र वी.पी. चोक तथा वडा नं. २ को नयाँपाटी चोकमा आकस्मिक घुम्ती रक्तदान कार्यक्रम सम्पन्न भएको खबर प्राप्त भएको छ । सो रक्तदान कार्यक्रममा ७७ जना स्वयंसेवी रक्तदाताहरुले रक्तदान गर्नु भएको आयोजक संस्थाका अध्यक्ष विजयकुमार श्रेष्ठले सहकारी सञ्जाललाई बताउनुभयो । यही चैत ११ गतेदेखिको निरन्तरको लकडाउनका कारण रगतको अभाव भइरहेको सञ्चार माध्यमबाट जानकारी पाएकोले केही हदसम्म भएपनि रगतको अभाव कम गर्न सकियोस् भनेर रक्तदान कार्यक्रम आयोजना गरिएको उहाँको भनाई छ । त्यस अवसरमा आयोजक संस्थाका सञ्चालक समिति तथा लेखा सुपरीवेक्षण समितिका पदाधिकारी एवं सदस्य , शेयर सदस्यहरुका अतिरिक्त गोकर्णेश्वर नगरपालिका वडा नं. १ र २ का जनप्रतिनिधिहरु , स्थानीयबासीहरु , सुरक्षाकर्मीहरु , लगायतको उपस्थिति रहेको बताइएको छ ।
सो संस्थाले लकडाउनका वीच आफ्ना शेयर सदस्यहरुलाई पनि नयाँपाटी स्मार्ट मोवाइल बैंकिङ्ग सेवा , एटीएम(ATM) सेवा तथा अत्यावश्यक वित्तीय सेवा प्रदान गरिरहेको जनाएको छ ।
