जिल्ला विषयगत संघहरु प्रादेशिक विषयगत संघमा एकीकरण गर्ने नीतिको भक्तपुर जिल्ला बचत तथा ऋण सहकारी संघ लि.को आपत्ती
राष्ट्रिय सहकारी विकास बोर्डले तयार पारेको राष्ट्रिय सहकारी नीति ,२०६९ पुनरावलोकन मस्यौदाको उद्देश्य नं. ६ मा उल्लेखित जिल्ला विषयगत संघहरु प्रादेशिक विषयगत संघमा एकीकरण गर्ने भन्ने विषय सहकारी ऐन , २०७४ विपरीत रहेको भन्दै त्यसको भक्तपुर जिल्ला बचत तथा ऋण सहकारी संघ लि.ले आपत्ती जनाएको छ । सो संघका अध्यक्ष कृष्ण गोविन्द लाखाजुले सहकारी ऐन , २०७४ मा प्रारम्भिक संस्था , जिल्ला , प्रादेशिक र संघ गरी ४ तहको सहकारी संरचना स्पष्ट रुपमा उल्लेख भएकोले राष्ट्रिय सहकारी विकास बोर्डले तयार गरेको राष्ट्रिय सहकारी नीति , २०६९ को पुनरावलोकन मस्यौदाको उद्देश्य नं. ६ कुनै पनि हालतमा मान्य नहुने बताउनुभयो ।
त्यसको विरोध गर्दै भक्तपुर जिल्ला बचत तथा ऋण सहकारी संघ लि.ले २०७७ श्रावण १६ गते राष्ट्रिय सहकारी महासंघ लि.का अध्यक्ष मिनराज कँडेललाई महासंघको कार्यालय, पुल्चोक, हरिहरभवन ललितपुरमा र नेपाल बचत तथा ऋण केन्द्रीय सहकारी संघ लि.(नेफ्स्कून) का अध्यक्ष परितोष पौड्याललाई नेफ्स्कूनको केन्द्रीय कार्यालय, नयाँ बानेश्वर , काठमाडौंरधैमा ज्ञापन-पत्र बुझाएको छ । 
सहकारी ऐन , २०७४ मा जिल्लाको अवधारणा रहेकै हुनाले आत्मनिर्भर रुपमा सञ्चालित विषयगत जिल्ला संघहरु एकीकरण नगर्न सो ज्ञापन-पत्रमा माग गरिएको छ । हाल कोभिड- १९ को महामारीको विषम परिस्थितिमा सहकारी संघ/संस्थाले कसरी साधारणस७भा गर्ने भन्ने विषयमा मार्गदर्शन र नियामक निकायसँग सहजीकरण गर्न ज्ञापन-पत्रमा अनुरोध गरिएको छ । सो संघले ज्ञापन-पत्रमा प्रतिनिधिमूलक साधारणसभा गर्न सक्ने व्यवस्था वा अन्य वैकल्पिक व्यवस्था हुन आवश्यक रहेकोले यो षिययमा तत्काल निर्क्योल गर्न माग गरेको छ ।त्यसैगरी २०७७/०७८ को अध्यादेश अनुसार सहकारी संघ/संस्थाको बार्षिक आयमा ५ प्रतिशत मात्र कर लाग्ने व्यवस्था भइसकेको अवस्थामा सहकारी संघ/संस्थाले तरलता व्यफवस्थापनका लागि बैक तथा वित्तीय संस्थामा निक्षेप राखिएको रकमबाट पाउने ब्याजमा १५ प्रतिशत अग्रिम व्याज कर कट्टी गर्ने व्यवस्था अव्यवहारिक भएकोले अग्रिम ब्याज कर कट्टी ५ प्रतिशत वा सोभन्दा कम मात्र गर्न ज्ञापन-पत्रमा माग गरिएको छ । यस्तै, त्यस ज्ञापन-पत्रमा सहकारी संस्थाहरुले संघहरुबाट लिएको ऋणको ब्याजमा पनि १५ पतिशत अग्रिम ब्याज कर कट्टा गर्ने प्रावधान अव्यवारिक भएकोले संशोधनका लागि माग गरिएको छ ।
सो ज्ञापन-पत्र ग्रहण गर्दै राष्ट्रिय सहकारी महासंघ लि.का अध्यक्ष मिनराज कँडेले साधारण सभाको विषयमा भूमि व्यवस्था, सहकारी तथा गरिवी निवारण मन्त्रालय, सहकारी विभाग र अभियानमा छलफल गरेर निक्यौंल निकाल्ने प्रयास भइरहेको जानकारी बताउनुभयो । उहाँले ब्याजमा अग्रिम कर कट्टीको विषयमा ध्यानआकर्षण भएको र यसको संशोधनका लागि पहल गर्ने बताउनुभयो । उहाँले तहगत संरचनाको विषयमा अभियानमा छलफल गर्न आवश्यक रहेको औल्याउनुभयो ।
त्यसैगरी भक्तपुर जिल्ला बचत तथा ऋण सहकारी संघ लि.को ज्ञापन-पत्र ग्रहण गर्दै नेफ्स्कूनका अध्यक्ष परितोष पौड्यालले साधारणसभाको विषयमा सम्बन्धित मन्त्रालय, विभाग र अभियानबीच छलफल भइरहेको बताउनुभयो । उहाँले ब्याजमा अग्रिम कर कट्टीको विषयमा अर्थमन्त्री समक्ष जानकारी गराई सकिएको र मन्त्री स्वयंले संशोधनको विषयमा उचित पहल गर्ने प्रतिबद्धता समेत जाहेर भएको जानकारी गराउनुभयो । उहाँले मुलकमा संघीयताको बहस चलिरहेको सन्दर्भमा जिल्ला संघ बैधानिक पहिचानको विषय के हुन सक्छ , त्यस सन्दर्भमा अभियानसँगको विशेष छलफलआवश्यक रहेको औल्याउनुभयो । त्यस अवसरमा नेफ्स्कूनका अध्यक्ष परितोष पौड्यालले भक्तपुर जिल्ला बचत तथा ऋण सहकारी संघ लि.का अध्यक्ष कृष्ण गोविन्द लाखाजुलाई पुस्तक प्रदान गर्नु भएको थियो ।
भक्तपुर जिल्ला बचत तथा ऋण सहकारी संघ लि.का अध्यक्ष कृष्ण गोविन्द लाखाजुको नेतृत्वमा गएको भक्तपुर जिल्लाका सहकारी अभियानकर्मीहरुको प्रतिनिधि मण्डलले उक्त ज्ञापन-पत्र बुझाएको छ ।
