ललितपुर जिल्ला बचत संघको आयोजनामा भर्चुअल मार्फत ‘सहकारीमा आयकर’ तालिम सम्पन्न
ललितपुर जिल्ला बचत तथा ऋण सहकारी संघ लि.को आयोजनामा आज भर्चुअल मार्फत ‘‘सहकारीमा आयकर (Income Tax on Cooperative)” तालिम सम्पन्न भएको छ । कोभिड-१९ को जोखिमलाई ध्यानमा राखी सो संघका नियमित कार्यक्रम अन्तर्गत सदस्य सहकारी संस्थाहरुको क्षमता विकासको लागि भौतिक उपस्थितिमा सञ्चालन गर्न नसकिए पनि भर्चुअल मार्फत तालिम सञ्चालन गरिएको आयोजकको भनाई छ ।
उक्त तालिम उद्घाटनको अवसरमा सोही संघका अध्यक्ष रामहरि बजगाईले हाल कतिपय सहकारी संस्थाहरुमा कर सम्बन्धी विभिन्न प्रकारका समस्याहरु उत्पन्न भएको परिप्रेक्षमा तालिममा आय, निर्धारणयोग्य आय र करयोग्य आय, आर्थिक अध्यादेशका विशेष व्यवस्थाहरु, आयमा छुट हुने र कट्टी हुने रकमहरु, व्यवसायको कर गणनाका विशेष अवस्थाहरु, किस्ताबन्दी कर तथा स्रोतमा करकट्टीको विवरण आदि विषयहरु समावेश गरी तालिम सञ्चालन गरिएको बताउनुभयो । उहाँले सहकारीहरुले लेखापरीक्षक मार्फत नभई कर्मचारी मार्फत कर सम्बन्धी काम गर्न सबैलाई आग्रह गर्नुभएको थियो । यस तालिमलाई वरिष्ठ चाटर्ड एकाउन्टेण्ट क्षितिज शर्माले सहजीकरण गर्नुभएको थियो ।
निशेधाज्ञा कै समयमा त्यस संघको आयोजनामा भर्चुअल माध्यमबाट यस अगाडि कोरोना महामारीमा तरलता व्यवस्थापन तालिम , आन्तरिक नियन्त्रण प्रणाली कार्यक्रम र सहकारीमा सम्पति शुद्धिकरण सम्बन्धी व्यबस्था र व्यवहारिक प्रयोग कार्यक्रम , आत्म विकास व्यवस्थापन कार्यक्रम जस्ता कार्यक्रमहरु सञ्चालन भएका थिए ।
सो संघमा आजसम्म शेयर सदस्य संख्या ५२३ , शेयर पूँजी रु.५ करोड , निक्षेप संकलन रु.१ अर्ब ७० करोड , कर्जा लगानी रु.१ अर्ब १७ करोड र कूल कारोवार रु.१ अर्ब ८० करोड रहेको सोही संघका व्यवस्थापक सन्तोष बजगाईले सहकारी सञ्जाललाई बताउनुभयो । उहाँले ‘गत वर्ष नै सहकारीमा जोखिम व्यवस्थापन गर्न हाम्रो यस संघले रु.१० करोडको कोष स्थापना गरेको थियो र त्यसलाई यसपाली पनि निरन्तरता दिइएको छ’ भन्नुभयो । यस संघले आफ्नो सदस्य संस्थामा तरलता अभाव भएमा विना सेवा शुल्क न्युनतम व्याजदरमा एउटा संस्थाले रु.२० लाखसम्म कर्जा लिन सक्ने र निशेधाज्ञाको समयभित्रै बुझाएमा कर्जाको निशेधाज्ञाको अवधिको व्याजमा १० प्रतिशत छुट दिने व्यवस्था गरेको उहाँको भनाई छ ।
