उदयदेव बहुउद्देश्यीय सहकारी संस्था लि.,महेन्द्रनगरद्वारा बिऊ प्रशोधन केन्द्र स्थापना
कञ्चनपुरको महेन्द्रनगरमा रहेको उदयदेव बहुउद्देश्यीय सहकारी सहकारी संस्था लि.ले आफ्नै ब्राण्डमा कृषकहरुलाई गुणस्तरीय बिऊ बिजन उपलब्ध गर्ने उद्देश्यले बिऊ प्रशोधन केन्द्र स्थापना गरेको जानकारी प्राप्त भएको छ । भिमदत्त नगरपालिकाका मेयर सुरेन्द्र बिष्टले उद्घाटन गर्नु भएको सो प्रशोधन केन्द्रले गुणस्तरीय बिऊ प्रशोधन गर्न थालेको बताइएको छ । कृषकहरुको सहभागिता रहेको उक्त प्रशोधन केन्द्रले त्यस संस्थाको १ बिगाहा जमिन ओगटेको छ । त्यसै संस्थाको रु.४३ लाख १० हजार र प्रधानमन्त्री कृषि आधुनिकीकरण आयोजना कार्यान्वयन इकाई महेन्द्रनगरको अनुदान सहयोग रु. ३८ लाख २५ हजार लागतमा स्थापना भएको त्यस प्रशोधन केन्द्रमा २ टन क्षमताको सीड टीटर ,२ टन क्षमताको सीड ग्रेगरी र २ टन क्षमताको इलिभेटर तथा बोरा सिउने मेशिन , इलेक्ट्रिक फर्म स्केल , चिस्यान मीटर लगायतका उपकरण रहेको जनाइएको छ ।
कृषकहरुले उत्पादन गरेको बिऊ बजार मुल्य भन्दा १० प्रतिशत बढी मुल्यमा खरीद गरी त्यसलाई प्रशोधन गरी आफ्नो ब्राण्डमा हाम्रो यस संस्थाका शेयर सदस्यहरुलाई सहज ढंगबाट गुणस्तरीय बिऊ बिजन उपलब्ध गराउन र उहाँहरुलाई आय आर्जनसँग जोडेर आत्मनिर्भर बनाउन सहयोग गर्ने उद्देश्यले यो बिऊ प्रशोधन केन्द्र स्थापना गरिएको त्यसै संस्थाका प्रमुख कार्यकारी अधिकृत गणेश चन्दको भनाई छ ।
सोही संस्थाको सहयोगमा कृषकहरुले २५ बिगाहा भन्दा बढी जमिनमा धानको बिऊ लगाएको बताइएको छ ।
