स्युचाटार साकोसले बचत फिर्ता नदिएपछि पीडित रवि क्षेत्रीद्वारा प्रधानमन्त्री तथा मन्त्रीपरिषद कार्यालयमा उजुरी
काठमाडौंको नागर्जुन नगरपालिकामा रहेको स्युचाटार बचत तथा ऋण सहकारी संस्था लि.ले लामो समयसम्म बचत फिर्ता नदिएपछि पीडित रवि क्षेत्रीले पुन: प्रधानमन्त्री तथा मन्त्रीपरिषद कार्यालयको ध्यानाकर्षण गराउनु भएको बताइएको छ । क्षत्रीले मंगलबार आफूले लामो समयसम्म सो सहकारी संस्थाबाट निक्षेप फिर्ता नपाएको भन्दै प्रधानमन्त्री तथा मन्त्रीपरिषद कार्यालयको सुशासन प्रवर्द्धन र भ्रष्टाचार नियन्त्रण शाखामा उजुरी गर्नु भएको छ ।
यस अघि पनि उहाँले प्रधानमन्त्री तथा मन्त्रीपरिषद कार्यालयमा उजुरी गर्नु भएको थियो । आफूले लामो समयसम्म निक्षेप फिर्ता नपाए पछि पुनः उजुरी हाल्नु परेको रविको भनाई छ । सो सहकारीमा ६ वर्ष अघि दीलिपबहादुर क्षत्रीले रु.३ लाख रुपैयाँ निक्षेप जम्मा गर्नु भएको थियो तर उहाँको ०६९ साल जेठ ३ गते निधन भयो ।
उहाँँको निधन पछि निक्षेप फिर्ता लिन जानु भएका छोरा रवी क्षेत्रीलाई उक्त सहकारीले रित्तो हात फर्काएको थियो । निक्षेप जम्मा गर्दा हकवालाको ठाउँमा लेखिएको रविको नाम काटेर अर्कै व्यक्तिको नाम लेखिएको बताइएको छ । निक्षेपको हकवाला अर्कै भएको दाबी गर्दै सो सहकारीले निक्षेप फिर्ता दिन मानेको छैन ।
उक्त सहकारीको रविले रकम फिर्ता माग्न थालेको ६ वर्ष बितिसकेको छ जनाइएको छ। लामो समयसम्म पनि निक्षेप फिर्ता नपाएपछि उनले प्रधानमन्त्री तथा मन्त्रिपरिषदको कार्यालयदेखि राष्ट्रिय सूचना आयोग , सहकारी मन्त्रालय, सहकारी विभाग हुँदै डिभिजन सहकारी कार्यालयसम्म धेरैपटक धाउनुभयो। रविको गुनासो गृह मन्त्रालयदेखि रक्षा मन्त्रालयसम्म पुगिसकेको छ ।
यस सहकारी विरुद्ध कागजात किर्ते गरी निक्षेपकर्ताको निक्षेप फिर्ता नदिएको अभियोगमा नेपाल प्रहरीको केन्द्रीय अनुसनधान ब्यूरो (सीआईबी) ले अनुसन्धान गरिरहेको छ । किर्ते र ठगीको विषय बाहिर आएपछि सीआईबीले अनुसन्धान शुरु गरेको हो ।
हाल सम्बन्धित निकायबाट राय माग्ने काम भइरहेको सीआईबी प्रमुख डिआईजी निरजबहादुर शाहीले बताउनुभयो । अनुसन्धान तीव्र पारिएको बताउदै यही महिनाभित्र टुंगोमा पुगिने डिआईजी शाहीको भनाई छ।
निक्षेपकर्ताले रोज्ने हकवालाको ठाउँमा रवि क्षेत्रीको नाम काटेर रमा क्षेत्री भन्ने नाम लेखिएको छ । सहकारी संस्थाले केरमेट आफूले गरेको स्वीकार गर्दै रविका बुवा दीलिप कै आग्रहमा केरमेट गरिएको उक्त सहकारी संस्थाले बताउदै आएको छ ।
(cns.coop.np को सहयोगमा तयार गरिएको )
